حوار مع ماكينه
كتب : هانى عبد الكريم
حوار ماكينة المترو
بعد قرار زيادة اسعار تذاكر المترو كان لنا حوار مع ماكينة التذاكر حيث اتوجة لعملى صباحا من خلالة
ماكينة الدخول / ياحبيبى قاطع بجنية طب عدى وحياة ماكنة امى هترجع هنا تانى
-استقليت المترو على نياتى بقى فى محطة الشهداء انزل امرر التذكرة لكن الماكينة لا تستجيب حاولت عدة مرات وفشلت
ماكينة الخروج /انت ياض من محدودى الدخل
- اة يا ستى معصلجة لية عدينى اتأخرت ع الشغل
- وانا مال اهلى اتاخرت ولا لاء مش هتعدى يا ضنايا
- مش هعدى لية بقى التذكرة مضروبة ولا مستعملة
- لا يا حبيبى التذكرة دى اخرها اربع محطات اية اللى جابك هنا يا مزوغاتى يا وسخ
- مزوغاتى اية بس ما انا كل يوم بركب بجنية
- دة كان زمان يا حيلتها دلوقتى لاء
- ما الانسة قاطعة معاية بجنية وعدتيها اهوة
- مزاجى يا اخى انت هتشاركنى ثم دى موزة عارف لو وحشة كنت ركنتها جمبك
- يا ستى طب عدينا وبكرة ابقى اقطع تذكرة حلوة
- يلا ياض امشى من هنا
-اما انك ماكنة قليلة الادب صح
- انا قليلة الادب يا مزوغاتى يا وسخ يا امين يا عسكرى
- طب خلاص وطى صوتك اللة يخرب تذاكرك عاوزة اية
-يلا ياض ارجع من حيث اتيت
- يا ستى ارجع اية بس وراية شغل والنبى طب انط من فوقك فى الخباثة كدة
- اة يا وسخ انت واخد ع النط بقى يا امين يا عسكرى
-يا لهوى خلاص دة انتى مكنة زبالة والله العظيم اكسرك حتت
- تكسر نى لية هوة انا هفية دة انا املاك دولة قرب منى كدة
- انتى مفكرانى هخاف اهوة
- تعالى بقى يا امين يا عسكرى يا امين يا عسكرى
الامين - مالك يا مكنة
- امسك المزوغاتى دة
- فين تذكرتك يا كابتن
- يا عم تذكرتى اهة ومعرفش ان التذاكر غليت المكنة مش عاوزة تعدينى
- طب هتدفع غرامة 11.60
- لية يا سيدى بص انا اعلامى ودة الكارنية بتاعى ميصحش بقى عشان نص جنية نتعامل كدة
- اوك خلاص هعديك المرة دى بس متعملهاش تانى
الماكينة / يخرب بيتك تعدية ازاى امسكة
- دة انتى ماكنة زبالة اتفووووووة عليكى
- ماشى يا حبيبى هتروح منى فين هترجعلى
.jpg)
